പറവൂര്: ബഫര്സോണ് വിഷയത്തില് സര്ക്കാരിന്റെ അലംഭാവവും കെടുകാര്യസ്ഥതയും മാപ്പര്ഹിക്കാത്ത കുറ്റമെന്ന് പ്രതിപക്ഷ നേതാവ് വി.ഡി.സതീശന്. ജനവാസമേഖലകളെ പൂര്ണമായും ഒഴിവാക്കണമെന്ന് 2013 ല് ഉമ്മന് ചാണ്ടി സര്ക്കാരിന്റെ കാലത്ത് മന്ത്രിസഭാ യോഗം തീരുമാനമെടുത്ത് കേന്ദ്രസര്ക്കാരിനെ അറിയിച്ചു. എന്നാല് ഇക്കാര്യത്തില് കേന്ദ്ര പരിസ്ഥിതി മന്ത്രാലയം ചോദിച്ച സംശയങ്ങള്ക്കു മറുപടി നല്കാന് 2016ല് അധികാരത്തിലെത്തിയ പിണറായി സര്ക്കാര് തയാറായില്ല. ഇതോടെ 2018ല് ഈ തീരുമാനം റദ്ദായി. ഇതിനു പിന്നാലെ ജനവാസകേന്ദ്രങ്ങളെ ഉള്പ്പെടുത്തി ഒരു കിലോമീറ്റര് ബഫര്സോണ് പ്രഖ്യാപിക്കണമെന്നു തീരുമാനിച്ച് 2019ല് പിണറായി സര്ക്കാര് കേന്ദ്രത്തെ അറിയിച്ചു. ജനവാസ മേഖലകളില് ബഫര്സോണ് ആകാമെന്നു തീരുമാനമെടുത്ത മന്ത്രിസഭായോഗത്തിലെ അംഗമായിരുന്ന എം.എം. മണിയാണ് ഇടുക്കിയില് ഹര്ത്താലിന് ആഹ്വാനം നല്കിയതെന്നും പ്രതിപക്ഷേ നേതാവ് പറഞ്ഞു.
റിപ്പോര്ട്ട്
ന്യൂസ് ഡെസ്ക്
