ബെംഗളൂരു: ബെംഗളൂരു ചിന്നസ്വാമി സ്റ്റേഡിയത്തിന് സമീപം തിക്കിലും തിരക്കിലും പെട്ട് മരിച്ചവരില് 14-കാരിയും. ദിവ്യാംശി എന്ന കുട്ടിയാണ് മരിച്ചത്. ജൂൺ 4 ബുധനാഴ്ച വൈകിട്ട് ചിന്നസ്വാമി സ്റ്റേഡിയത്തിന് സമീപം തിക്കിലും തിരക്കിലും പെട്ട് 11 പേരാണ് മരിച്ചത്. നിരവധിപേർക്ക് പരിക്കേറ്റു. ഇതിൽ പലരുടേയും നില ഗുരുതരമാണെന്നാണ് ലഭിക്കുന്ന വിവരം. മരിച്ചവരുടെ ആശ്രിതര്ക്ക് പത്ത് ലക്ഷം രൂപയും പരിക്കേറ്റവര്ക്ക് പൂര്ണ്ണമായും സൗജന്യ ചികിത്സയും കര്ണാടക സര്ക്കാര് നല്കുമെന്ന് മുഖ്യമന്ത്രി സിദ്ധരാമയ്യ അറിയിച്ചിട്ടുണ്ട്.
സുരക്ഷാ ക്രമീകരണങ്ങളെല്ലാം പാളി.
.ബെംഗളൂരുവിന്റെ ഐപിഎല് കിരീടവിജയത്തോടനുബന്ധിച്ച് ചിന്നസ്വാമി സ്റ്റേഡിയത്തില് സംഘടിപ്പിച്ച പരിപാടി കാണാൻ എത്തിയവരാണ് അപകടത്തില്പ്പെട്ടത്. സ്റ്റേഡിയത്തിന് പുറത്ത് വന് ജനക്കൂട്ടമാണ് ദൃശ്യമായത്. വിധാൻസൗധയില് നടന്ന അനുമോദനച്ചടങ്ങിന് ശേഷമാണ് ചിന്നസ്വാമിയിലെ പരിപാടി നിശ്ചയിച്ചിരുന്നത്. സ്റ്റേഡിയത്തിന് പുറത്ത് മണിക്കൂറുകള്ക്കുമുമ്പ് തന്നെ ആളുകള് ഒഴുകിയെത്തി. അതോടെ സുരക്ഷാ ക്രമീകരണങ്ങളെല്ലാം പാളി. അതിനിടയില് മഴ പെയ്തതോടെ ആളുകള് തുറന്ന പ്രദേശത്തുനിന്ന് മാറാന് തുടങ്ങി. ആളുകള് ഒരുമിച്ച് നീങ്ങിയത് വലിയ അപകടത്തിലേക്ക് നയിക്കുകയായിരുന്നുവെന്നാണ് വിവരം.
പോലീസ് നേരത്തേ തന്നെ മുന്നറിയിപ്പ് നല്കിയിരുന്നു.
ആളുകള് വന് തോതില് എത്തിച്ചേരുന്നതു സംബന്ധിച്ച് പോലീസ് നേരത്തേ തന്നെ മുന്നറിയിപ്പ് നല്കിയിരുന്നു. വിക്ടറി പരേഡടക്കം നടത്താനാവില്ലെന്ന് അറിയിക്കുകയും ചെയ്തിരുന്നു. സുരക്ഷയ്ക്കായി അയ്യായിരത്തോളം പോലീസുകാരെയാണ് നിയോഗിച്ചിരുന്നത്.എന്നിട്ടും അപകടം ഉണ്ടായത് സുരക്ഷാ വീഴ്ചയിലേക്കാണ് വിരൽ ചൂണ്ടുന്നത്. ഇത്രയും വലിയ അപകടം ഉണ്ടായിട്ടും ആഘോഷങ്ങൾ നിർത്തിവയ്ക്കാൻ അധികൃതർ തയാറായില്ല.
