സല്യൂട്ട് നല്കുന്നില്ലെന്ന പരാതിയുമായി തൃശൂര് മേയര് എം കെ വര്ഗീസ്. ഔദ്യോഗിക കാറില് എത്തുമ്പോൾ പൊലീസ് ഉദ്യോഗസ്ഥർ സല്യൂട്ട് നല്കുന്നില്ലെന്നാണ് ആരോപണം. തന്നെ പൊലീസുകാർ ഗൗനിക്കുന്നില്ലെന്ന് സിറ്റി പൊലീസ് കമ്മിഷണറോടും സ്ഥലം എം എൽ എയോടും പരാതിപ്പെട്ടിരുന്നതായി എം കെ വർഗീസ് പറയുന്നു. ഇതുസംബന്ധിച്ച് മേയര് ഡി ജി പിക്ക് പരാതി നല്കി. . മേയറുടെ പരാതി തൃശൂര് റേഞ്ച് ഡി ഐ ജിക്ക് കൈമാറി. ഉചിതമായ നടപടിയെടുക്കണമെന്നാണ് നിര്ദേശം. പല തവണ പരാതി നല്കിയിട്ടും പൊലീസ് മുഖം തിരിച്ചെന്നും പരാതിയില് പറയുന്നു. കേരളത്തിലെ ഒരു മേയർക്കും ഈ ഗതി വരാതിരിക്കാനാണ് താൻ പരാതി നൽകിയതെന്ന് എം കെ വർഗീസ് 02/07/21 വെളളിയാഴ്ച വ്യക്തമാക്കി.
എന്നാൽ പൊലീസുകാരെ കൊണ്ട് സല്യൂട്ടടിപ്പിക്കുന്ന ധിക്കാര സമീപനമാണ് മേയറുടെതെന്ന് മുഖ്യമന്ത്രിക്ക് പരാതി. നിർബന്ധപൂർവ്വം പൊലീസുകാർ സല്യൂട്ടടിക്കണമെന്ന ആവശ്യം നടപ്പാക്കരുതെന്നാണ് പരാതിക്കാരനായ പൊതു പ്രവർത്തകനായ അനന്തപുരി മണികണ്ഠൻ്റെ ആവശ്യം.
പൊലീസ് ഉദ്യോഗസ്ഥര് സല്യൂട്ട് ചെയ്യുന്നില്ലെന്ന പരാതിയുമായി മേയര് എം കെ വര്ഗീസ് രംഗത്തെത്തിയതിന് പിന്നാലെയാണ് മേയർക്കെതിരെയും പരാതി ഉയര്ന്നത്.
കോർപ്പറേഷൻ പരിധിയിലെ ചടങ്ങുകളിൽ പങ്കെടുക്കുമ്പോൾ മാത്രമാണ് മേയറെ സല്യൂട്ട് ചെയ്യേണ്ടതുള്ളൂവെന്നാണ് പൊലീസിൻ്റെ വിശദീകരണം.
