ന്യൂഡല്ഹി: ഇംഗ്ലീഷ് ദിനപത്രത്തിലെഴുതിയ ലേഖനത്തില് പ്രധാനമന്ത്രി നരേന്ദ്ര മോദിയെ പ്രശംസിച്ചത് താന് ബിജെപിയില് ചേരാനൊരുങ്ങുന്നതിന്റെ സൂചനയല്ലെന്ന് കോണ്ഗ്രസ് എംപി ശശി തരൂര്. ഓപ്പറേഷന് സിന്ദൂറിന് പിന്നാലെ സര്വകക്ഷിസംഘങ്ങള് വിദേശരാജ്യങ്ങളില് നടത്തിയ സന്ദര്ശനത്തിന്റെ വിജയത്തെക്കുറിച്ച് പരാമര്ശിക്കുന്നതിനിടെയാണ് മോദിയുടെ ഊര്ജസ്വലതയും കാര്യപ്രാപ്തിയും ഇടപെടാനുള്ള സന്നദ്ധതയും സംബന്ധിച്ച് താന് പറഞ്ഞതെന്ന് തരൂര് വ്യക്തമാക്കി. കോണ്ഗ്രസ് നേതൃത്വവുമായുള്ള അഭിപ്രായ വ്യത്യാസത്തിന് പിന്നാലെ മോദിയെ പുകഴ്ത്തിക്കൊണ്ടുള്ള ലേഖനം തരൂര് ബിജെപിയില് ചേരുന്നതിന്റെ സൂചനകളാണെന്ന വിധത്തില് ചില മാധ്യമ റിപ്പോര്ട്ടുകള് പ്രത്യക്ഷപ്പെട്ടിരുന്നു. ഈ പശ്ചാത്തലത്തിലാണ് തരൂരിന്റെ വിശദീകരണം.
മറ്റു രാജ്യങ്ങളുമായുള്ള ഇടപെടലില് പ്രധാനമന്ത്രി നരേന്ദ്ര മോദി തന്നെ, ഊര്ജവും കാര്യപ്രാപ്തിയും പ്രകടിപ്പിച്ചു.
സര്വകക്ഷിസംഘത്തിന്റെ ദൗത്യം വിജയിച്ചതിനേക്കുറിച്ച് താന് വിശദീകരിക്കുന്ന ലേഖനമായിരുന്നു അതെന്ന് തരൂർ പറഞ്ഞു. ദൗത്യത്തിന്റെ വിജയം എല്ലാ പാര്ട്ടികളുടെയും ഐക്യത്തെയാണ് വ്യക്തമാക്കിയത്. മറ്റു രാജ്യങ്ങളുമായുള്ള ഇടപെടലില് പ്രധാനമന്ത്രി നരേന്ദ്ര മോദി തന്നെ, ഊര്ജവും കാര്യപ്രാപ്തിയും പ്രകടിപ്പിച്ചു. ബിജെപിയുടെ വിദേശനയമെന്നോ കോണ്ഗ്രസിന്റെ വിദേശനയമെന്നോ ഇല്ല. ഇന്ത്യയുടെ വിദേശനയമെന്നേയുള്ളൂ. 11 കൊല്ലം മുന്പ് പാര്ലമെന്റിന്റെ എക്സ്റ്റേണല് അഫയേഴ്സ് കമ്മിറ്റി ചെയര്മാന് ആയ സമയത്തുതന്നെ പറഞ്ഞ കാര്യമാണിത്. പ്രധാനമന്ത്രി നരേന്ദ്ര മോദിയുടെ പാര്ട്ടിയിൽ ചേരാൻ ഒരുങ്ങുന്നു എന്നതിന്റെ സൂചനയല്ലിത് .ഇത് ദേശീയ ഐക്യത്തെ കുറിച്ചുളള പ്രസ്താവനയാണ് തരൂർ പറഞ്ഞു. .
“മോദിയുടെ ഊർജവും കാര്യപ്രാപ്തിയും ഇടപെടാനുളള സന്നദ്ധതയും ആഗോള വേദികളിൽ ഇൻഡ്യയുടെ സ്വത്താണ് ” എന്നായിരുന്നു ഹിന്ദുവിലെ ലേഖനത്തിൽ തരൂപ് പറഞ്ഞിരുന്നത്. പിന്നാലെ ഈ ലേഖനം പ്രധാന മന്ത്രിയുടെ ഓഫീസിന്റെ ഔദ്യോഗിക എക്സ് അക്കൗണ്ട് പങ്കുവയ്ക്കകുയും ചെയ്തിരുന്നു.
