തിരുവനന്തപുരം: ശക്തമായ മഴ പെയ്യാനുള്ള സാധ്യത കണക്കിലെടുത്തു കേന്ദ്ര കാലാവസ്ഥാ നിരീക്ഷണ കേന്ദ്രം ജില്ലയില് ജൂലൈ 23ന് യെല്ലോ അലേര്ട്ട് പ്രഖ്യാപിച്ചു. 24 മണിക്കൂറില് 64.5 മുതല് 115.5 വരെ മില്ലി മീറ്റര് മഴ പെയ്യാനാണു സാധ്യത. ഇതു മുന്നിര്ത്തി പൊതുജനങ്ങള് ജാഗ്രത പാലിക്കണമെന്നു ജില്ലാ കളക്ടര് ഡോ. നവ്ജ്യോത് ഖോസ അറിയിച്ചു.
ശക്തമായ മഴയെത്തുടര്ന്ന് ആളുകളെ മാറ്റിപ്പാര്പ്പിക്കേണ്ട സാഹചര്യമുണ്ടായാല് പൊതുജനങ്ങള് അധികൃതരോടു സഹകരിക്കണമെന്നു കളക്ടര് പറഞ്ഞു. തീര പ്രദേശത്തു കടലാക്രമണത്തിനു സാധ്യതയുള്ളതിനാല് അപകട മേഖലകളില് താമസിക്കുന്നവര് ജാഗ്രത പാലിക്കണം. ആവശ്യമെങ്കില് മാറി താമസിക്കണം. മത്സ്യബന്ധനോപധികള് സുരക്ഷിതമാക്കിവയ്ക്കണം. അടച്ചുറപ്പില്ലാത്ത വീടുകളില് താമസിക്കുന്നവരും മേല്ക്കൂര ശക്തമല്ലാത്ത വീടുകളില് താമസിക്കുന്നവരും മുന്നറിയിപ്പുകളുടെ അടിസ്ഥാനത്തില് സുരക്ഷയെക്കരുതി മാറിത്താമസിക്കാന് തയാറാകണം.
സ്വകാര്യ, പൊതു ഇടങ്ങളില് അപകടാവസ്ഥയില്നില്ക്കുന്ന മരങ്ങള്, പോസ്റ്റുകള്, ബോര്ഡുകള് തുടങ്ങിയവ സുരക്ഷിതമാക്കണം. മരങ്ങള് കോതി ഒതുക്കണം. അപകടാവസ്ഥകള് അധികൃതരുടെ ശ്രദ്ധയില്പ്പെടുത്തണം. ദുരിതാശ്വാസ ക്യാമ്പുകളിലേക്കു മാറേണ്ടുന്ന ഘട്ടങ്ങളില് കോവിഡ് മാനദണ്ഡങ്ങള് കര്ശനമായി പാലിക്കണമെന്നും കളക്ടര് പറഞ്ഞു.
