ലഖ്നൗ: ബലാൽസംഗത്തിനിരയായി കൊല്ലപ്പെട്ട ഹാത്രാസിലെ പെൺകുട്ടിയുടെ കുടുംബത്തിന് ദയയല്ല നീതിയാണ് വേണ്ടതെന്ന് സി പി എം ജനറൽ സെക്രട്ടറി സീതാറാം യെച്ചൂരി പറഞ്ഞു. പെൺകുട്ടിയുടെ വീട് സന്ദർശിച്ച ശേഷം മാധ്യമ പ്രവർത്തകരോട് സംസാരിക്കുകയായിരുന്നു യെച്ചൂരി.
ഇടതു നേതാക്കൾ 6/10/20 ചൊവ്വാഴ്ച്ച രാവിലെയാണ് പെണ്കുട്ടിയുടെ വീട്ടിലെത്തിയത്. സി.പി.ഐ.എം ജനറല് സെക്രട്ടറി സീതാറാം യെച്ചൂരി, സി.പി.ഐ ജനറല് സെക്രട്ടറി ഡി. രാജ, പൊളിറ്റ് ബ്യൂറോ അംഗം ബൃന്ദാ കാരാട്ട് എന്നിവരാണ് പെണ്കുട്ടിയുടെ അച്ഛനമ്മമാരെ സന്ദര്ശിച്ചത്.
നേരത്തെ സി.പി.ഐ.എം കേന്ദ്ര കമ്മിറ്റിയംഗങ്ങളും പെണ്കുട്ടിയുടെ വീട് സന്ദര്ശിച്ചിരുന്നു. സി.പി.ഐ.എം കേന്ദ്രകമ്മിറ്റി അംഗവും അഖിലേന്ത്യാ കിസാന് സഭ ദേശീയ ജോയിന്റ് സെക്രട്ടറിയുമായ വിജൂ കൃഷ്ണന്, പാര്ട്ടി കേന്ദ്രകമ്മിറ്റി അംഗവും സി.ഐ.ടി.യു ദേശീയ സെക്രട്ടറിയുമായ എ.ആര് സിന്ധു, അഖിലേന്ത്യാ കര്ഷക തൊഴിലാളി യൂണിയന് ജനറല് സെക്രട്ടറി ബി. വെങ്കട്, കര്ഷക തൊഴിലാളി യൂണിയന് ദേശീയ ജോയിന്റ് സെക്രട്ടറി വിക്രം സിങ്ങ്, അഖിലേന്ത്യാ ജനാധിപത്യ മഹിളാ അസോസിയേഷന് ട്രഷറര് പുണ്യവതി, സംഘടനയുടെ ജോയിന്റ് സെക്രട്ടറി ആശാ ശര്മ എന്നിവരാണ് ഹാത്രാസ് പെണ്കുട്ടിയുടെ വീട്ടിലെത്തിയത്.
കോണ്ഗ്രസ് നേതാക്കളായ പ്രിയങ്ക ഗാന്ധിയും രാഹുല് ഗാന്ധിയുമടക്കമുള്ള കോണ്ഗ്രസ് നേതാക്കള് ഹാത്രാസിലെ കുടുംബത്തെ നേരത്തേ സന്ദര്ശിച്ചിരുന്നു.
