തിരുവനന്തപുരം: സംസ്ഥാനത്ത് 18 നും 45 വയസിനും ഇടയില് പ്രായമുള്ളവര്ക്ക് കോവിഡ് വാക്സിന് വിതരണം തിങ്കളാഴ്ച ആരംഭിക്കുമെന്ന് മുഖ്യമന്ത്രി പിണറായി വിജയന്. വാക്സിനേഷനുള്ള രജിസ്ട്രേഷന് നാളെ മുതല് തുടങ്ങുമെന്നും അദ്ദേഹം വ്യക്തമാക്കി.സംസ്ഥാനത്ത് കോവിഷീല്ഡ് വാക്സിന് ആദ്യ ഡോസ് സ്വീകരിച്ച് 84 ദിവസം പൂര്ത്തിയായവര്ക്ക് മാത്രമേ നാളെ മുതല് രണ്ടാമത്തെ ഡോസ് അനുവദിക്കുകയുള്ളു. കേന്ദ്ര ആരോഗ്യ കുടുംബക്ഷേമ മന്ത്രാലയം നല്കിയിട്ടുള്ള പുതുക്കിയ മാര്ഗനിര്ദ്ദേശ പ്രകാരമാണ് ഈ മാറ്റം. ഇതനുസരിച്ച് 12 മുതല് 16 ആഴ്ചകള്ക്കുള്ളില് കോവിഷീല്ഡ് രണ്ടാമത്തെ ഡോസ് വാക്സിന് എടുത്താല് മതിയാകും.
എന്നാല് കോവാക്സിന് രണ്ടാമത്തെ ഡോസ് മുമ്പ് നിശ്ചയിച്ചിട്ടുള്ളതു പോലെ തന്നെ നാല് മുതല് ആറ് ആഴ്ചക്കുള്ളില് എടുക്കണം. ഇതില് മാറ്റം വരുത്തിയിട്ടില്ലെന്നും അദ്ദേഹം പറഞ്ഞു.വൃദ്ധ സദനത്തിലുള്ളവര്, ആദിവാസി കോളനിയിലുള്ളവര് എന്നിവര്ക്ക് വാക്സിനേഷന് അടിയന്തരമായി പൂര്ത്തിയാക്കാന് നിര്ദേശം നല്കിയിട്ടുണ്ട്. ആംബുലന്സ് ഡ്രൈവര്മാരില് വാക്സിനേഷന് എടുക്കാത്തവര്ക്കും അടിയന്തരമായി ലഭ്യമാക്കും.രണ്ടാം ഡോസ് എടുക്കുമ്പോള് 84 മുതല് 112 ദിവസങ്ങളുടെ ഇടവേള കൂടുതല് ഫലപ്രാപ്തി നല്കുന്നു എന്ന് കണ്ടെത്തിയതിനെ തുടര്ന്നാണ് രണ്ട് ഡോസുകള് തമ്മിലുള്ള ഇടവേള വര്ദ്ധിപ്പിച്ചിട്ടുള്ളത്. വാക്സിനേഷന് കേന്ദ്രങ്ങളില് തിരക്ക് കൂട്ടേണ്ട കാര്യമില്ല. എല്ലാവര്ക്കും വാക്സിന് ലഭ്യമാകുമെന്നും മുഖ്യമന്ത്രി വ്യക്തമാക്കി.
റിപ്പോര്ട്ട്
ന്യൂസ് ഡെസ്ക്
