ഫ്രാന്‍സില്‍ കനത്ത സുരക്ഷ

പാരീസ്: ലോകകപ്പ് ഫൈനലിന് മുന്നോടിയായി ഫ്രാന്‍സില്‍ സുരക്ഷ ശക്തമാക്കി. 14,000 പോലീസുകാരെയാണ് രാജ്യത്തിന്റെ വിവിധ ഭാഗങ്ങളില്‍ മുന്‍കരുതലായി വിന്യസിച്ചത്.കാണികള്‍ കൂട്ടം കൂടാന്‍ ഏറ്റവും സാധ്യതയുള്ള പാരീസിലെ തെരുവുകളില്‍ സുരക്ഷ ഇരട്ടിയാക്കിയെന്ന് ആഭ്യന്തര മന്ത്രി ജെറാള്‍ഡ് ഡാര്‍മാനിന്‍ പറഞ്ഞു. ഫ്രാന്‍സ് കിരീടം നേടിയ 1998, 2018 ലോകകപ്പുകള്‍ക്ക് ശേഷം ചാമ്പ്‌സ്- എലീസ്‌ള അവന്യുവില്‍ ആഘോഷങ്ങള്‍ പരിധി വിടുന്ന അവസ്ഥയായിരുന്നു. നാലു വര്‍ഷം മുമ്പ് 6,00,000 പേരാണ് ആഘോഷങ്ങള്‍ക്കായി അവന്യുവിലെത്തിയത്. ഇവിടെ ഗതാഗതം നിരോധിച്ചതായും 2,750 പോലീസുകാരെ അധിക സുരക്ഷയ്ക്ക് നിയോഗിച്ചതായും ഡാര്‍മാനിന്‍ പറഞ്ഞു.